TEXT: cimoi pemcrsoneto

[Jorge Llambias <jorge@PHYAST.PITT.EDU>]

                  ckape litru

        i dei lisri le nu cpare lo cmana
        i go'i le nu sisku le ka manci
        le rirci xruli poi titla se panci
        zi'e poi ia xabju le traji cpana

        i ca le nu finti dei kei mi zgana
        le nu le romoi gusni pe le vanci
        sekai le ka lazni cu masno canci
        i le nu mi ciska dei cu se ckana

        i xu frili fa le nu mi le zdani
        cu cliva bai le banli mukti  i na
        i ju le te zukte cu mutce trina

        i le pluta cu nandu gi'e clani
        i ca binxo le lerci  i le tsani
        cu manku  i ai mi catlu lo skina

mi'e xorxes