le fanva po'u la marb.

[Goran Topic <topic@math.hr>]

.i cukta lu la marb. li'u la nensis. farmer.



to ju'i doi xorxes. .e doi kris. do na djica lenu kansa mi lenu fanva
.inaja ko de'a tcidu di'e .iku'i ta'onai fi'i rodo .eji'a redo ko
jinvi cusku mu'i do djica la'edei toi




.i cusku fa

   la pavterlis. (1)
ce la relterlis. (2)
ce la ritas.     (R)
ce la tendais.   (T)
ce la garika,is. (G)
ce le ruxtavla   (X)



1. fu'e


   .i caki lese detri beli pi'erepasovo la harares. poi raltca la
   zimbabues. se nenri lo banli selstu po'u la marb.

2: .i zo'i lo brabra bitmu noi fanta lenu se zunti le tcadu ku'o loi goi
   ko'a la marb. xabju cu cuxna lenu tarti loka puze'u friko .i ko'a
   nurma cmalu ke lanzu xabju gi'e se purdi filo ko'a cidja gi'e se
   tcaci lo tcesau kulnu beko'a

1: .i ci loi goi ko'e panzi belo nobli ke gunma badyca'i no'u la
   tendais. poi nanla joi la ritas. poi mensi je citmau beri joi la
   kudas. poi bruna je citmau beri .i ko'e pu se zerle'a ca'o lenu klama
   fole tcadu gi'ebabo puzi bajli'a lo vindu festi sorcu poi jaivi kavbu
   ko'e failo balba'i ninmu peme'e la fetxant.

2: .i ko'e ca'o lenu denpa lomu'e kakne co klama lo ko'a xa'uzda cu
   selpu'a loka la marb. melbi gi'e se xaurxa'u .i la sa'e tendais. go'i
   .iku'i la ritas. tersi'o frica fitu'a my. ni'o



R (se fanza): .i xamgu ba'e do .i do ba'e nanmu .i do kakne lozu'o vreta
   tirna lo lisri .i ba'e mi bilga .oi lozu'o se mosra file loldi gi'e
   lumci loi taxfu gi'e jisygau lo craloi gi'e .oi.o'unai.y gasnu loka
   lo cifnu matci cu vacri vifne vau .oi.iunai.a'unaicai .i xu do na
   kakne lenu cpedu tu'a lo blikinfonxa mu'i lenu mi'o tavla la paf. .i
   roda cuxna loka na tirna mi .oi

1: .i la ritas. se murta ne'i lo cmalu foikunti lo denmi dzitricu .i ry.
   bevri lo derxi beloi mabla toljinsa boxfo poi te sruma ledu'u cifnu
   matci kei la tendais.

T (ruble se voksa): .i cuxna loka na tirna mi ji'a .i mi pu na'o troci
   ze'a lo djedi

2: .i la tendais. rinju le kulnu bela marb. lonu kansa la ritas. .i lo
   nilci'o simsa be ty. nanla na zifre co kansa loi nixli pu lenu pu'o
   speni

R: .i ca'ala'a cuxna loka tirna do .i mi tirna lo se casnu beloi prenu
   .i ri cusku lu .u'e lo cnino nanla cu xaupensi .i .u'e ri terlisri
   melbi li'u .i ra jinvi ledu'u do xagrai cnino pu'o lonu finti loi
   rasyjukpa smacu (se rigni desku) .i do viska xu le selke'i danlu no'u
   ra ca le pamoi nicte

T: .i loi dzena bema'a ca'a citka ra .iji'a ma'a na recnarcti

R: .i lei dzena cu citka ra goi ko'a .iku'i lo fetsi po'o dzena cu bilga lenu
   catra ko'a .i do .ei tirna lei cmalu selcmo beko'a

T (vatcni): .oiro'i.u'ocu'i ko na .e'o skicu

1: lo malpanci beloi cifnu matci cu ruble se renvi .i la tendais. djica
   lenu sidju la ritas. tu'a ra .iku'i la'edi'u na ju'o curmi

R: .i ta'o me le goi ko'a remoi fetspe bela garika,is. no'u le ralju .i
   xu do djuno ledu'u la tcipos. no'u ko'a nanca lixokau .i li cai pavo
   .i ko'a pu'o se jbena ze'u lo masti belize sai

.i .oiro'a ko ruble bacru

R: .i ko .oi seki'u lenu mi ruble bacru cu tirna mi .i le pamoi fetspe
   bela garika,is. noroi jbena .i le ruxtavla cusku lesedu'u fy.
   su'ocu'o selmipri maltermakfa .i go'i lesedu'u lo maltermakfa cu
   citka lo cifnu beri .i do ca'axu tersku lo bebna dunli bela'edi'u

T: smaji fako

R (co'a ruble bacru): la garika,is. la tcipos. co'a speni ca leza'i ri
   nanca lipare .iku'i ko'a puzapu na se tarbi .i gy. goi ko'e xanka
   ju'o tu'a le jbena .i ko'e punai se panzi gi'eseri'abo ckeji leti
   kulnu .i .u'e mutce falenu ko'a se jundi .i dukse falenu ko'a daspo
   lo badmakfa .i ko'a selsa'e filoi kapxaungrasu .i lenu ko'a kargau
   le ko'a moklu kei rinka lenu ri te setca lo cidja

T: .i .uanai nabmi fama

R: .i do jinvi ledu'u le lanzu cu jinvi ledu'u makauxire .ii fuzme

2: .i la tendais. tsacatlu ry. .i ri ganse loka da tceraktu ry.

R (basna): .a'onai .i ti numxa'u .i na mikce

T: .i lo ninmu cu renvi leza'i puza puze'e na mikce kei

R: .i ba'e su'o lo ninmu go'i doi malbebna .i .o'onai.o'unai do simlu
   leka na ka'e tercki .i dukse faleni la tcipos. citno .i do tcenei lo
   puze'u tarti .isejuku'i lo ninmu .e lo cifnu co'a morsi fau lonu
   jbena kei ku'u loi puze'u melbi je'unai .i ko pensi la'edi'e ji'a .i
   mi bilga lenu gunka lo da'amei .ito'unai mi klurinju fitu'a lo cidja
   .iji'a do bigycti sepi'o lo tecpalta poi noda djica co pencu .i do
   co'a xu jimpe

T (se jenca): .ua.o'unai mi'o maltermakfa terji'i

R: .i .uadai .i lo maltermakfa cu setca filo drata cidju .i mi'o na se
   lacri pu'o lenu le ruxtavla jai cipra loka na ckini lo maltermakfa
   kei mi'o .i ri na fasnu pu'o lomu'e la tcipos. seljbe

1: .i la tendais. co'a sanli

T: .i mi klama .ei .i lo drata cu sisku ba'a tu'a mi ki'u tu'a le bakni
   kuku pemi'a .ei .iku'i nu'e. do mi bamo'u platu

R: .i mi'a cliva .e'ucai

2: la tendais. bajli'a loi dzitricu .i ty. co'a jimpe ledu'u ri nupre
   segi'u djuno noda lenu se gasnu filenu cliva ni'o



1: caki le bavlamcerni la tendais. co'a cikna ri'a re selki'a .i la
   tcipos. seljbe lo nanla

2: .i la tendais. ba'o vreta gi'e se lidne bele drata nanla ku klama lo
   barda fagri poi se jmaji loi se lanzu .i ty. sisku tu'a la ritas. lo
   denmi .iku'i ry. na zvati dy.

1: .i zutse lo stizu fala garika,is. no'u le ralju .i ne'a ri lo punai
   viska bela tendais. zutse .i ri nalselpukselflira gi'e bluselkanla
   gi'e daspo so'i badmakfa gi'e jgari lo since rakyga'i dzugrana .i
   birti falenu ra ruxtavla

2: .i lo prenu cu bletavla gi'e xadjai ri ki'u loka cerni lenku .i la
   tendais. snobi'o co sanji leka na'e drani .i ty. sojypa'a lenu roda
   gleki .iku'i ri xanka simlu .i ty. kucli lejei lo cifnu cu malba'o
   kei .eji'a lejei ri morsi

1: .i lo nimtolci'o cu barkla lo zdani gi'e bevri lo bakfu gi'e klama
   lei seltse bela garika,is. kujoi le ruxtavla gi'e gasnu lenu co'u
   bakfu lo cifnu lo boxfo .i cy. laukrixa

G (selpu'a): .i .ue.o'a tsali

2: .i le ruxtavla cu catlu lo cifnu goi ko'a ca'o loza'i loi se lanzu cu
   xanka denpa .i li'a ry. na nelci loi cifnu .a ko'a .i ry. frumu joi
   lanli bele selcinje ke cmalu flira .i temci

X (nalxendo): .i cmima mi'o

1: .i barvasxu faloi prenu

2: .i roda co'a cisma gi'e ba'o xanka

G (tcegei tecu'u roda): .i .u'a.oinai mi selbe'a .iu.ui

1: .i suksa falomu'e lo patxu cu porpi .i da cmoni .i roda gejmlusa'i

2: .i la tendais. tirna lo krixu belo cifnu poi .ue drata ko'a

1: .i lo nixli cu barkla le mintu zdani .i lego'i du la ritas. .ue .i
   riji'a bevri lo bakfu

2: .i ry. klama la garika,is. noi cnimlu leka le tsali cu falda'i ke'a

G (steba gi'e bonxa'eselrivtoi): .i .ainai.uinai

R (mi'ecpe): ti do ju'a tixnu

G: .i .ainai la'edi'u na jetnu tu'a mi .i ta mabla gutrykancinfu

R (cnize'a): .i ti fackanro .i .oiro'e le nunjbe djupre cu catra tersi'o
   ko'a

G: .i ta ruble je malmakfa cifnu gi'e bazi morsi

R: .e'inai ko ba'e tirna ti .i ri na ruble (pu'o klaku) .i do na .aicai
   catra lo cifnu

X (nalcni): ro gutrykancinfu cu malpalci

R: no cai cinfu cu palci

X: sarcu falenu lo gutrykancinfu cu morsi gi'e derse'a ni'a le loldi
   bele nunjbe zdani

R (laucmo): .i ja'odai ju'o lo nixli cu se cuxna tezu'e la'edi'u .i lo
   nixli cai cu na jai seldji .i ri cai na xamgu .i ri cai bleselva'i
   .i rodo mabla kusru cai je nakni cai je datxei cai malrigni cai

1: .i le ruxtavla cu zukte lopu'u le dzugrana cu galtu kei lenu darxi la
   ritas. dy. .iku'i la tendais. dy. kavyvi'u ry. gi'e ne'inre'o lo fagri
   .i dy. co'a jelca

2: loi lazypre cu klurigni selpajva'u

X (degyselfa'a la ritas. joi la tendais.): ko kavbu reta

1: loi se lanzu lei goi ko'a re verba cu pipkavbu gi'e jgari .i da
   kavyvi'u lo cifnu .i da dunda la garika,is. lo grana

2: .i le ralju cu ze'u sanli lo jibni beko'a .ibabo suksa falonu lo ri
   flira cu dunku frubi'o .i ry. renro le grana gi'e ruble klama le ri
   stizu

X (nalcni): .i bau ko le ti malverba le velsfazda cu klama

1: .i la tendais. .e la ritas. selcpu gi'ebabo se nercatke folo manku

2: .i ko'a ze'a smaji tepydesku zutse

R (ruble): .i mi ckire do lenu sarji mi

T (xendo): .i .a'a.i'i ma fasnu

R: .i mi klurinju filenu zvati lonu jbena .iku'i mi pu catlu .ausai
   .iki'u mi punai viska lo zi jbena .i mi smakla le vorme .i nanla co
   finpe cilmo .ibabo nixli jbena .i loi nunjbe djupre co'a dauta'a .i
   la tcipos. co'a klaku .i pa ra klama la garika,is. mu'i lonu ciksi
   tu'a lo gutrykancinfu

T: .ija'o ra pu djuno

R: .i ro le lazypre go'i gi'eku'i tarti leka na go'i gi'emu'ibo na
   selpu'a lenu catra lo cifnu

T: .i xu da go'i

R: .i ly. krici ledu'u le gutrykancifnu cu malmakfa .i pa lo gumcifnu cu
   xamgu .iku'i lo drata beri cu xlali gi'e catra jai sarcu .i lei
   nunjbe djupre cu jdice lodu'u lo da'amei beri cu bevri le nanla la
   garika,is. gi'e cliva le zdani poi jaine'i kurji fai le romoi be dy.
   lo nixli .i .uapei (barvasxu) .i mi tirna cu'u dy. lesedu'u vajni
   firi faleka smaji .iki'ubo lenu ny. krixa cu nibli leza'i roda djuno
   ledu'u ra jmive .i fau lego'i lenu tarti lenu da'i ny. mrojbe na se
   kakne

T: .iku'i .uanai roda pu djuno

R: .i .ieju'o .i simsa la xamburger. poi mi citka ku'u le xabju bemi .i
   mi djuno lodu'u mu'i xy. lo bakni cu morsi gi'eku'i nelcu'a loza'i na
   pensi la'edi'u gi'e tarti lenu xy. selkra lo sroku'a .isi'a lo lanzu
   cu tarti lenu lo xlali cifnu cu mrojbe

T: .i ta'i ma do fanta tu'a le nixli

R: .i stali fapo'o la tcipos. poi ruble gi'eseri'abo na sanli kakne ku'o
   .e pa tolcitno ninmu .i ri cpacu lo ba'o se fagri poi purmo ku mu'i
   lenu tisyse'a ri le moklu bele nixli goi ko'a

T: .i .a'unairo'i

R: .i mi darxi le tolcitno le stedu lo tansi .ibabo mi le cifnu cu cpacu
   gi'e batci fo loi degji .ibabo lenu ra krixa cu carmi sai .i lenu
   trati leka ri morsi cu banai selka'e

1: .i la ritas. cu tsali cnidesku gi'e co'a klaku

2: .i la tendais. ri xadjai gi'e kufygau dikni .i ty. djuno ledu'u
   ri na tarti tu'a le'e lazbu'a va'o tu'a lo mensi be ri .iku'i ty.
   jgira tu'a la ritas gi'e se rigni le puzu tcaci


   fu'o



co'o mi'e. goran. noi pacna lenu do di'u nelci gi'eku'iji'a terpinka

--
Learn languages! The more langs you know, the more incomprehensible you can get
e'udoCILreleiBANgu.izo'ozo'onairoBANguteDJUnobedocubanRI'a.ailekadonaka'eSELjmi