Re: ckafybarja

["Jorge J. Llambías" <jorge@INTERMEDIA.COM.AR>]

i lo prenu cu nerkla le ckafybarja
i py jbibi'o le se'ujbu gi'e cpedu lo'e lenku birje
i ze'a le nu denpa le nu le birje cu se cpacu
cu cusku lu ba'a uiro'o lenku birje i noda by xagmau
le ka vimcu le ka taske
i lo jibni noi crane lo mligla djacu kabri cu tirna py gi'e
xebni catlu
i lu do'a le do birje doi mikce li'u cu'u le barjyse'u
i py ba le nu vu'izga le birje cu cusku lu pe'u doi barjyse'u
mi xagji ji'a i e'o mi cpacu lo'e cidjrpitsa li'u
i lu uiro'o ba'a cidjrpitsa i noda cy xagmau le ka kansa
lo lenku birje li'u
i le mligla djacu kabri crane cu rere'u xebni catlu

co'o mi'e xorxes