TEXT: The Terrifying Adventure of the Windmills

[Jorge LLambias <jorge@PHYAST.PITT.EDU>]

I've translated an excerpt from a chapter of Don Quixote. All corrections,
suggestions, comments, etc. are most welcome.

------------------------------------------------------------------------

bimo'o prosa le zabna fasnu be fa le nu la donkixotes bifymlo ke se
terpa lifri noi pu noroi co'a se pensi
ije go'i le termojyxau fasnu noi drata

no'i la donkixotes goi ko'a e la santcopansas goi ko'e facki fi fo'a
goi cinoji'ivono bifymlo be va le srasu foldi
i ca le nu ko'a fo'a co'a viska cu cusku fi le ko'a santyse'u fe lu
        be'ucu'i le su'u le selfunca ca'o gidva le mi'o cuntu cu zabna
        zmadu le su'u mi'o pu'i pacna
        i va le nu facki fi ji'iza'uso'u cilce brabracrida kei do viska
        doi pendo po'u la santcos le pu'o se damba be mi
        ije go'i le te lebna be le ka jmive bei mi
        ije go'i le te vimcu be fo le mi'o co'a se ricfu
        i vu'e le nu jamna le go'i cu vrude
        i xamgu selfu le cevni le nu vimcu le palci tsiju fo le terdi
        sefta
        li'u
i ko'e cusku lu
        ma brabracrida
        li'u
i le ko'e selse'u ko'e spuda lu
        do viska le go'i noi birka clani
        i ca'a se cafne le nu le ri so'o birka cu ki'otre piso'a li ci
        li'u
i ko'e ko'a spuda lu
        ju'i doi nobli le va simla goi fo'a brabracrida na.e bifymlo
        i le fo'a simla be lo birka cu balre le molki
        i le go'i ca le nu ca'o se catke le brife cu gasnu le nu le
        molki rokci cu carna
        li'u
i ko'a ko'e spuda lu
        za'a do na certu le ve capli'u
        i fo'a brabracrida ju'o
        i i'ecu'i xu do terpa paunai
        i ai ko sezmu'u fi ta
        i ko jdasku ca le nu mi fo'a damba co cilce je na'e simsa
        li'u
i ca le nu ca'o cusku di'u kei ko'a jafti'e minde le xirma po'u la
rosinantes
i na'e jundi le ko'e krixa kajde be fi le nu le pu'o se gunta cu
bifymlo enai brabragrida
i ko'a birti le du'u fo'a brabragrida
i seja'ebo na'e tirna le ko'e voksa gi'e na'e viska le ca'a me fo'a
ki'unai le nu vi zvati fo'a
i ca'o cladu cusku lu
        le'o ko na rivbi fi'inai tolvri je palci danlu
        i za'upa le nobli do na gunta
        li'u
i co'a brife ca le nu co'u go'i
i le barda balre co'a carna
i ko'a seri'i le nu viska le nu go'i cu cusku lu
        mi do pu'o sfasa ki'unai le nu do muvdu le brika se klani be li
        le brabracrida po'u la briareos brika
        li'u
i ca le nu ba'o cusku di'u kei ko'a sezpevdu'a le ko'a fetno'i po'u la
dulsineas gi'e pikci ri le nu sidju sera'a le ca ckape
i le xacysanta ca'o marbi ko'a
ije le claxa'i cu bredi
i ko'a fo'a co'a klama
i ko'a gunta le pamoi ca'u molki
i ko'a darxi le molki le xarci le balre noi tsali se muvdu le brife
ja'e le nu porpi gasnu le xarci gi'e farlu gasnu le xirma e le
xirselma'erno'i noi carna re'o le foldi
i ko'e ko'a fu le xasli cu klama co sutra be du'i le ni ri ka'e no'a
i ca le nu ba'o klama kei ko'e facki le du'u ko'a na'e ka'e sezmu'u
i la santcos cusku lu
        le cevni mi'o uu bandu
        i xu mi le mi nobli pu cusku le du'u ko traji pensi le nu zukte
        i xu go'i fi le du'u fo'a ca'a bifymlo noi ka'e na'e se djuno
        le po'o se stedu co vasru be fo'a
        li'u
i la donkixotes ko'e spuda lu
        ko smaji doi pendo po'u la santcos
        i ka'u le jamna cuntu ka'e binxo semau ro le drata
        i le prije po'u la frestOn noi zerle'a le mi kumfa e le cukta
        cu galfi le brabragrida le molki sezu'e le nu mi claxu le nu
        jinga fi fo'a
        i le go'i mi bradi
        i ca le famfa'o le tolka'erselylacri je palci na snada le nu
        fapro le mi dakyxa'i vrude
        li'u
i la santcopansas spuda fi lu
        ba fasnu du'o le cevni
        li'u
i ko'e ko'a sidju le nu co'a sanli gi'e xirma cpare la rosinantes noi
milxe spofu
i li'oli'o

-----------------------------------------------------------------------

mi'e xorxes