TEXT: vomoi pemcrsoneto

[Jorge Llambias <jorge@PHYAST.PITT.EDU>]

        xukydei


        ca lo tcelenku djedi pe le masti
        ca le ciromoi masti pe le critu
        noda muvdu vi le zunle ja pritu
        i roda ca'o le djedi cu klasti

        i mi kucli le du'u xukau zasti
        ku'u le vi bragu'e fa lo krinu
        be le nu le vi panpi smaji jvinu
        lei tcaci ke cladu klaji cu basti

        i lei mi selpei cu nerkla lo sarlu
        i pe'u doi ka'e ciksi ko darlu
        le du'u ki'u makau kunti klaji

        i mi viska le nu va snime farlu
        i mi cmimo le kamtolkansa traji
        i ro lanzu lo ri xruki cu jmaji


mi'e xorxes