drata ke ckafybarja lisri

[jorge@PHYAST.PITT.EDU]

mi nerkla le ckafybarja i ne'iku milxe manku i le ralju selska be le
barja cu bunre i so'i klesi be loi bunre i mudri loldi ije mudri bitmu
i ji'a lei jubme cu mudri gi'eku'i se cpana loi blabi je xunre jubgai
noi na gacri piro le sefta i lo na'e mutce gusni cu pagre lei ca'orgai
i ranji sance loi nu loi dirgo lei blaci cu bleda'i i ne'inaiku carvi

i mi zutse re'o lo canko ne'a lo kojna i mi na se pamei lei te barja
i to'o mi va lei re jubme cu zutse fa lo remei noi tolylau simtavla
i lo citno nanmu noi pinxe lo tcati ku'o joi lo citno ninmu noi mi
djuno le du'u ke'a se cmene zo citlat kei ki'u le nu mi tirna le nu
cy cusku di'u le citnau i la citlat se jibri le nu bevri i oi u'i i'a
mi denpa i cy simlu le ka dukse jundi le citno nanmu gi'enai zgana le
nu mi zvati

i babo za lo mentu be li so'o da goi ko'a barkla le jupku'a i pe'i
ko'a bruna la citlat i ko'a cy mintu le ka xekri kerfa gi'e mlibu'e
skapi i mi cpedu lo tcati ku joi loi titnanba i ca le nu ba'o bevri
ra mi kei ko'a zutse do'e le mi jubme i xu tcaci lei ti beipre fa
le nu zutse kansa lei te barja i lu tolmelbi tcima li'u se cusku
ko'a ba le nu pinxe lo spisa be le tcati poi ko'a ke'a pu bevri
ko'a i lu ie tolmebli tcima li'u se cusku mi noi za'o milxe cilmo

i baza lo xabycacra ko'a ba'o te lisri le ko'a nunjmive fo mi i mi
na refterlisri ki'u le nu dukse clani i ku'i ko se xanri i so'i cinri
fasnu i so'o se badri i so'o se gleki i ca le nu ko'a mo'u tavla kei
mi mo'u citka lei titnanba gi'e mo'u pinxe le tcati i mi ckire ko'a
le nu kansa kei gi'e nupre le nu mi ba xruti i mi cliva i la citlat
joi le citnau za'o tolylau simtavla

                                -  *  -

co'o mi'e xorxes