Re: kau

[Logical Language Group <lojbab@ACCESS.DIGEX.NET>]

Colin's Princess:

lu le nolraixli nega'u le dembi li'u
                cmene di'e noi se finti
                        la xans. krIstian. Andrsn
.itu'e
tu'e

lisri le nolrainanla goi ko'a .i ko'a djica lo nolraixli .i ri mulno
beloka nolraixli be'o gi'o se zanru ko'a .isemu'ibo ko'a fe'eroroi litru
gi'e sisku pa go'i .iku'i roroi nabmi .i sa'e ge lo nolraixli cu raumei
ju'o gi loniri nolraixli ku ko'a na se birti .uu .i roroiku le no'e
drani vau .i ko'a ki'u seizdakla gi'e badri lenu na'epu'i cpacu lo
nolraixli mulno

ni'o pa vanci cu ki jaica ke selte'a viltcima .i lindi joi savru joi
carvi joi camcilce .i zo'e darxi le ta'uvro .ile so'irnanca nolraitru
ki'u minde lenu le vorme cu karbi'o .i le bartu cu nolraixli
.i ri selkecmlu .uuse'inai ri'a tu'a lo carvi .ebo lo xlali viltcima
.i mo'ini'a flecu lo djacu vi le kerfa .e le taxfu .i flecu ji'a pa'o le
cutci file cucti'e le cucyzbi tosa'a pamoi pinka toi .i cusku fara
ledu'u ra nolraixli mulno


ni'o lu .ue .i cipra .ai li'u se sezycu'u le so'irnanca truspe goi fo'e
.ije ri bacru noda ku'i gi'e klama le sipku'a gi'e vimcu role ckabukpu
gi'e punji le pa dembi le ckazbe .ijebabo fo'e cpacu reno vresaikicne
gi'e cpana punji ri le dembi .ipa'aku reno datkypi'u gacykicne co'a
cpana le sairkicne .i rogo'i cu se vreta le nolraixli goi fo'a ca'o le
nicte

ni'o co'i le cerni cu preti fofo'a feleli'i fo'a capu sipna ge'ekau
.i lu .oicairo'o seisa'a selcu'u befo'a .i mi su'eso'uroi .uu ganga'i le
kanla ca'o piro le nicte .i ma? za'anai pausai nenri le ckana
.i mi puca'o vreta le raktu jdari .i piro lemi xadni ri'a bunre joi
blanu
.i to'e zdile .oisai li'u

.i seni'ibo co'i djuno ledu'u fo'a nolraixli je'a mulno ki'u lenu fo'a
fi le reno sairkicne kujo'u le reno gacykicne cu ganse fele dembi .i lo
ckaji be loka ganse du'ila'edi'u cu nolraixli mulno ju'o

ni'o le nolrainanla goi ko'a co'a speni fo'a .i ko'a seki'u djuno ledu'u
vo'a kansa le mulno beloka nolraixli .i le dembi ba se punji fi la
larkumfa tosa'a remoi pinka toi .i caji'a go'i .ijo noda capu vimcu
.iacu'i tu'u ni'o di'u jetnu lisri .uo .ui


tu'u

ni'oni'o di'e pinka

.i pamai le lujvo po'u zo cucyzbi cu satci te fanva fezoidy.  Naesen paa
Skoen dy.  .i mi nelci ledi'u bangrdanska tanru

.i remai tu'e la larkumfa po'u la'o dy.  Kunstkammeret dy. cu ga'orbi'o
cale nanca beli pabirepa gi'eseri'abo ca'a teke carmi morji caze'u le
lisri .i le'i ca'a jmaji noi selzda le to'ercitno ke nolraitru ckuso'u
dinju cu selcmi so'i vrici nemu'u lo prucedra lisri kuce lo nairske
lisri kuce lo rarske cizra

tu'u .i di'u se krasi le pinka nebau la dansk. fola xans. briks. jo'u la
.anker. iensn.





/
nolraixli       - nobli traji nixli
nolrainanla     - nobli traji nanla
seizdakla       - sevzi zdani klama
selte'a         - se terpa
viltcima        - vlile tcima
camcilce        - carmi cilce
ta'uvro         - tcadu vorme
nolraitru       - nobli traji turni
karbi'o         - kanri binxo
selkecmlu       - se kecti simlu
cucti'e         - cutci trixe
cucyzbi         - cutci nazbi
sezycu'u        - sevzi cusku
truspe          - turni speni
sipku'a         - sipna kumfa
ckabukpu        - ckana bukpu
ckazbe          - ckana zbepi
vresaikicne     - vreta sarji kicne
datkypi'u       - datka pimlu
gacykicne       - gacri kicne
sairkicne       - sarji kicne
selcu'u         - se cusku
larkumfa        - larcu kumfa
ga'orbi'o       - ganlo binxo
selzda          - se zdani
ckuso'u         - cukta sorcu
selcmi          - se cmima
prucedra        - purci cedra
nairske         - natmi saske
rarske          - rarna saske