Re: Lojban text production (RE: ni, jei, perfectionism)

[JORGE JOAQUIN LLAMBIAS <jorge@INTERMEDIA.COM.AR>]

>>I translated a Spanish translation of an Aymara children's story.
>
>Did you post it?  It doesn't sound familiar.

I think you even commented it. :)
Here it is again:

TEXT: le gunse ku joi le lorxu
From: jorge@PHYAST.PITT.EDU
Date: 29 apr 1995

i le de'e lisri cu xe fanva lo spano xe fanva be fo le bangrxaimara i la
aimaras cu ketco natmi i ri xabju la bolivias joi la perus joi le berti
be la tciles joi la arxentinas i le bangrxaimara cu mutce cinri i mi pu
tcidu lo piso'umei sera'a ra

-----------------------------------------------------------------------

                     le gunse ku joi le lorxu

.i zuku zuku le fetygunse ku joi le fetlorxu cu tavla simxu .i le gunse
pu kansa lei ri panzi .i zutse loi rokci .ibabo le lorxu cu klama je
penmi gy .i ly cusku lu ua doi gunse ri'a ma lei do panzi ne tai lo
zunri cu melbi .i lei me mi na go'i .i ri gruzi .i au ri simsa lei me do
.i ta'i ma do cpacu lei panzi noi tai melbi li'u

.i le gunse cu spusku lu lei me mi pu se jukpa .i mi glare jukpa ri le
nu nerpu'i rori le toknu .i e'u ko jukpa lei me do .i aupei mi bregau le
toknu sei le gunse cu cusku li'u

.i lu ausai ko zbasu le toknu sei le lorxu cu cusku .i ta'i ma cu zbasu
le toknu .i xu me ti li'u .i ly lebna loi bliku mu'i le nu zbasu le
toknu .ibabo ly glagau ce'o glagau le toknu ja'e le nu ri mutce glare

.ibabo le gunse cu cusku lu e'u ko klagau lei do panzi ti .i mi'o ba
punji ra le nenri be le toknu .ibabo selgaigau ra le glare dertu
.i roroi ca le nu do tirna le nu spoja keikei ko cusku lu paboi reboi
li'o li'u gi'e klama ru'u le toknu .ibabo lei do panzi ba'o binxo lo
simsa be lei zumri ne du'i lei me mi li'u

.i ta'i la'e di'u le lorxu nerpu'i lei ri panzi le toknu .i lu i'esai me
ta sei le gunse cu cusku li'u

.i la'e lu me ta li'u se zukte le lorxu .i ca'o le nu le lorxu cu
nerpu'i lei ri panzi le toknu kei le gunse ku joi lei ri panzi cu darno
klama fo le lalxu .i mutce darno le lorxu

.i ki'unai le nu lei lorpanzi cu dunku klaku kei le lorxu na jundi ra
gi'e nerpu'i ra le toknu .ibabo ua co'a spoja fa lei betfu be lei
lorpanzi .i roroi ca le nu lo betfu cu spoja kei le lorxu cu sruri klama
gi'e gleki cusku lu paboi li'u fa'ubo lu reboi li'u fa'ubo lu ciboi li'u
fa'ubo lu voboi li'u fa'ubo lu muboi li'u

.ibabo ca le nu le lorxu cu barle'a lei ri panzi le kevna kei le gunse
cu mutce darnu bu'u le lalxu .i le lorxu cu barle'a lei ri panzi noi
ba'o tabybi'o

.i lu mo e'enai sei le lorxu cu cusku li'u .i co'a klaku

.ibabo ly tcefengu gi'e cusku lu ai mi ba sudgau le lalxe li'u .i ly
pinxe ce'o pinxe mu'i le nu sudgau le lalxe .i ku'i ki'unai le nu mutce
pinxe na snada le nu sudgau le lalxe .i le ly betfu ba'o plana binxo .i
ly darkla ca'o le nu cirko lo djacu ra'i le trixe .i ly jdesku lu o'i
e'u ju'i kinli pezli ko na batci mi li'u

.i badri je klaku klama fo le cmana .ize'iku lo kilpezli ly batci
.i zo pof .i ly spoja

.i mulno

--------------------------------------------------------------------
mi'e xorxes